السبت، يناير 30، 2010

بقيت من ذوي الإيصالات...

الإيصال (اسم): قطعة من الورق المستطيلة، مكتوب عليها رقم طلب استخراج البطاقة الانتخابية وتاريخ الطلب

بتتوزع مجانا في الإدارات الانتخابية باقسام الشرطة، وآخر فرصة للحصول على الورقة المستطيلة هي بكره (31 يناير)، وما بتاخدش عشر دقايق وتكون معاك.

التفاصيل...
في يوم متَرّب، مغيم، مش برد أوي ... اتجهت لقسم الجيزة في وقت الكهربا كانت قاطعه فيه. وأنا طالع الإدارة الانتخابية راجل الأمن تحت سألني عن اسمي وشاف البطاقة، أنا استشفيت أنه بيدور على اسمي الكامل عشان يضيفني عنده عالـFacebook، يعني بالعقل هيكون إيه غير كده!

بما إني ما كانش معايا صورة البطاقة (عادي نسيت!)، نزلت ومشيت لغاية ما لقيت راجل أمن ابن حلال بتاع NSGB قلت له عايز أصور البطاقة، قالي هات أصورهالك ... راجل كُمّل الحقيقة

رجعت للقسم، فقالولي خد معاك الست الكبيرة دي وصلها لفوق، قلت يا سلام .. بس كده. واحنا طالعين الست دعت للراجل قالت له "ربنا يحفظك من كل حاكم ظالم" .. إحم!

طلعت بصورة البطاقة، (وصورة شهادة الميلاد ما عملتش بيها حاجة)، ومليت الطلب واتمضى واداني قطعة الورق المستطيلة وقالي تعالى (أنا بنفسي) استلم البطاقة في شهر خمسة، بالرغم من إني مواليد 87، لكن قدري إن اتولدت بره مصر (ده أكبر دليل على إن الأم هي اللي بتربي). شهر خمسة ... يا سلام، ده أنا أنزل أجازة مخصوص، هو أنا عندي أغلى من البطاقة

فنفهم من كده إيه؟ خلي عندك بطاقة، عشان تقدر تغير الجو المترّب! ... وربنا عالــ..ــم قد إيه أنا قلبي أبيض!

قضيت يوم جميل بعد كده مع شباب الكلية، وفي معرض الكتاب ;)

هناك 4 تعليقات:

5olio يقول...

قشطة, انا بقى حظى انى كنت مولود فى مكان تانى غير اللى انا ساكن فيه, فقالولى روح للمكان اللى انته اتولدت فيه


انا كنت كتبت عن البطاقة الانتخابية من شهر

http://5olio-speak.blogspot.com/2010/01/blog-post.html


حاجة برة الموضوع:
متخلى أحسن الردود تكون تحت الموضوع مش تبقى فى صفحة لوحده كده :D:D.

Mohammed ElMorsy يقول...

هو غالبا ما كانش ينفع يقولولي روح للقسم اللي تابع للمنطقة اللي اتولدت فيها "بره مصر" :D

موضوعك جميل ;)

والردود بقت تحت الموضوع :)

Asmaa Magdi يقول...

I forgot mawdoo3 el beta2a el ente7'abeya da 7'ales :S, m3a enny kont nawya a3melha men b3d ma areet 5olio's post :(.

Comment maloosh 3elaqa bel mawdoo3 :D. It may be because of seeing so many books in the book fair walla eh, but this poster reminds me of the "for dummies" books :D.

Mohammed ElMorsy يقول...

momken tela2y esmek already metsagel (3shan enty mwaleed ba3d 82), in that case you can go get ur beta2a anytime. Don't know if you were born in Egypt or not :D

And about the pic.. Yes, it's the "for dummies" series thing :D